Шунчалик шафқатсиз бўларми фалак, Бир зумда ҳаётинг қилди чархпалак! Сенинг кулфатингдан эзилар дилим, Бир жумла айтишга ожиздир тилим. Дардларинга ҳамдард вафодор ёринг, Дунёда орттирган бисотинг-боринг, Ҳаётинг қувончи, дилдаги оринг, Кўз юмди кўролмай сенинг дийдоринг. Сен билан учрашиш бахтидан сархуш, Ширин хотирангдан қувонч уриб жўш, Оқ харир кўйлакда кўриб ажиб туш, Рухшонанг уйқуда кўзини юммиш. Дуога деб очган қўллари очиқ, Йўлинга термулган кўзлари очиқ, Бир қўлда обтоба бирида сочиқ, Онанг эшик пойлар, дарвозанг очиқ. Бахт излаб бахтсизлик бўлди улфатинг, Қалбларни зарбага солди кулфатинг. Наҳот шунча аччиқ бўлса қисматинг, Энди кимни кутиб ўтар фурсатинг?!
| 
