 Суратларда: Халқаро Комиссия котибияти раҳбари Меери-Мария Йаарва (Meeri-Maria Jaarva) хоним ва "Ўзбеклар Уюшмаси” ташкилоти координатори Баҳодир Узоқов
2010 йил 28 октябр куни "Ўзбеклар Уюшмаси” ташкилоти
координатори Баҳодир Узоқов Брюссел шаҳрида Халқаро Инқироз Гуруҳи Вице-Президенти
Ален Делетроз билан учрашиб, Қирғизистоннинг жанубида ўзбекларга нисбатан бўлиб
ўтган геноцид факти бўйича жабрланганлардан олинган Аризалар, ҳужжатлар, фото
ва видеоматериалларни тақдим этди.
Учрашувда Қирғизистондан ва Ўзбекистондан бошқа
давлатларга чиқиб БМТнинг Қочқинлар билан ишлаш Олий Комиссарлигига қочқинлик
мақомини беришни сўраб мурожаат қилган ўзбекларнинг муаммолари алоҳида муҳокама
қилинди. Жаноб Ален Делетроз Халқаро
Инқироз Гуруҳи ўзбек қочқинларини тақдирига бефарқ қараб турмаслигини ва қочқинлар
вақтинча яшаб турган давлатларнинг расмий органларига ўз ваколати доирасида мурожаат
қилишини билдирди.
Учрашувда Марказий Осиё минтақасидаги вазият муҳокама
қилинди.
Шу куннинг ўзида "Ўзбеклар Уюшмаси” ташкилоти
координатори Баҳодир Узоқов Брюссел шаҳрида шу йил июн ойида Қирғизистоннинг
жанубида бўлиб ўтган миллий низони текширувчи Халқаро Комиссия котибияти
раҳбари Меери-Мария Йаарва (Meeri-Maria Jaarva) хоним билан ҳам музокара олиб
борди. Қирғизистонда бўлиб ўтган қирғин ва ҳозиргача давом этаётган қирғиз миллатига мансуб оддий аҳоли, расмий ҳокимият вакиллари, ҳамда кучишлатар тизими ходимлари томонидан ўзбекларга нисбатан камситишлар
бўйича аниқ фактларга асосланган ҳужжатлар, фото ва видеоматериаллар Халқаро
комиссияга тақдим этилди.
Музокарада Халқаро текширув комиссияси
Қирғизистондаги қирғиндан жабрланган ўзбеклар ҳақидаги маълумотларни тўплаш ва
Қирғизистондан бошқа давлатларга чиқиб кетишга мажбур бўлган ўзбекларлар
орасида тергов маълумотларини тўплаш ва бошқа масаслалар бўйича "Ўзбеклар
Уюшмаси” ташкилоти билан ҳамкорлик қилиш ҳақида келишиб олинди.
Халқаро текширув комиссиясига мурожаат қилмоқчи
бўлган Ўш ва Жалолободдаги қирғинда жабр кўрган ва ҳозирги вақтда бошқа
давлатларда яшаб турган барча миллатдошларимиздан worlduzbek@gmail.com
электрон почтасига хат ёзиб мурожаат қилишларини сўраймиз. Халқаро комиссия
тўпланган маълумотларни Қирғизистоннинг расмийларига
тақдим этмасликни кафолатлайди. 
| 
